[التميميه]

ما جيت أدور عن الألقاب والشهرة = ما دمت شاعر بعين الزين يكفيني
والشهرة اللي بها الشعّار منبهرة = صدقني إنها أمر عادي وروتيني
بس إني حبيت أعلم وجه ابن فهرة = يقول منتب كفو للشعر وش فيني
يا حر قلبه وياناره ويا قهره = لامن قرالي قصيدة أو دواويني
يا هيه وقت التسامح إنقضى دهره = تبطي عظم ما تحرك شعرةٍ فيني
ليه أستعير الشعر ونا على نهره = ليه أسرقه دام هو خاتم بيديني
من كل بستان شعرٍ قاطفٍ زهره = مسحوبٍ وسامري وهلالي وهجيني
وما دمت أنا وأنت من دم ومن ظهره = وش فيك ؟ وشفيك ؟ دايم ما تدانيني
ما همني غير سيد الغيد والطهرة = لا قال عطني قصيدة قلت من عيني
لا غاب عني أبد ما تكمل السهرة = وكني معيد إلا شفته بعيديني
البدر ما يكتمل إلا نصف شهره = وإنتي كملتي بكل لحظة وكل حيني
روحك بروحي غدت يا شوق منصهرة = حتى غديتي من أعضائي وتكويني
خيّال أنا وإنت يالمحبوب لي مهرة= ودي أعسفك ولكن وينك وويني
قلبي يحبك نطقها بسره وجهره = اي والله إنك سكنتي في شراييني
لرضاك أسوق العمر لو العمر مهرة = والعمر وشهو ؟ العمر لو ما وصلتيني
وإن كان خفتي تغير نظرتي الشهرة = لا بوه شعرٍ وشهرة عنك تقصيني

8
8
8
8

كذا وبس احب الشعر

كذا وبس يكون شعر

وربي ابدعت

ماشاء الله تبارك الله

نص شامخ من راس شامخ

وربي شاعر وسيد الشعار بعد