الأوله اسمحوا لنا على الغيبه
و الثانيه متواضعه أتمنى أن تحوز على إعجابكم
راكب اللي ثوّرت عجته قبل الغروب=راكبه ما هو يهاب الملاوي و الوعر
فوق ( جمس) يطوي البعد و طوال الدروب=نوع بيكب(pick up)منوة اللي ينوّي بالسفر
إن بغيت أوصفه حار الفكر و أخطا السلوب= كايد وصفه بنظم الشعر و لا النثر
لونه من الشمس لا مالت لوقت الغيوب=لأبتدى وقت الشفق و انتهى وقت العصر
صممه (جورج) الخواجه و عداه العيوب=و اعتنى به و أظهره مثل مكنون الدرر
ما شراه إلا ثري على البنك محسوب=و لا تركه إلا فقير يناظر فـ السعر
لا مشى مشيته مشية شجاع و مهيوب=و إن وقف له هيبة تشبه لهيبة (عمر)
مركبه يشبه لحضن الغطاوي اللعوب=لون ليته يشبه لبرق وسم له سفر
جهزه يا راكبه ثم توجه للجنوب=و الخوي (مخاوي الليل)و لا (بو بكر)
تله وفي دربهم لا تهاب من الذنوب=صوب خلي صاحبي شوق قلبي و النظر
قل له إني كل ما هب من داره هبوب=يصطفق قلب المولع و يغشاه الكدر
و قل له إني كل ما لا ح برق له شبوب= زاد هم القلب و العين نوّت بالسهر
و قل له إني لا ذكرته و ذاب القلب ذوب=هل دمع العين هل السحايب للمطر
إن بغيت أسج نوب ذكرته ألف نوب=و إن بغيت أرتاح قام الوله يشر خطر
و جد حال اللي على الحزن و الوجد مغصوب= وجد من ذاق الشقا من صواديف الدهر
يا الغضي من حبكم لا نمل و لا نتوب= رف بحال اللي على بعدكم هل العبر
يا الله يا المطلوب يا غافر كل الذنوب=عجل بلقيا الغضي صاحبي شوق النظر