[بسكوته]

احتـرت مـن زود الغـلا ويــن اوديــك

وزن الغلا .. اللي يحمله قلب مغليك
يـا ثقـل ميزانـه .. و يـا خـفّ روحــه

فـي حاملـه قـصـرٍ عظـيـم و ممالـيـك
مـن طـول طولـه مـا تحلّـى سطـوحـه

شف كيف صار اللي كبر راحة ايديك
يشيـل لـك قـصـرك ويـرفـع صـروحـه

القصـر قصـرك .. واقلـط الله يحيـيـك
وعلى القصور المعـذره و السموحـه

خلك علـى عرشـه عسـى الله يخليـك
تـــراك للـمـجـروح بـلـسـم جــروحــه

عليـك يدعـي داعـي الشـوق واجـيـك
وارسـم لحبّـك بيـن الاضــلاع لـوحـه

صـــوره معانـيـهـا تـنـاسـب مـعـانـيـك
حمامتـيـن و نـهـر جـــاري و دوحـــه

حتّى سماك الشوق و الحب اراضيـك
والبـحـر احاسيـسـك نسيـمـه وبـوحـه

والليـل ياخـذ مـن غموضـك ويعطـيـك
وانفاسـك انسـام الصبـاح ووضـوحـه

هذا انـت عـاد ومـن يلـوم الغـلا فيـك
فــي حـبـك العـاشـق يحـقـق طمـوحـه

احتـرت مـن زود الغـلا ويــن اوديــك
يبـيـك قلـبـي مـيــر عـيـنـي شـحـوحـه

عيّـت علـيـك الـلـي نظـرهـا يراعـيـك
دايـم مـعـك فــي كــل جـيـه و روحــه

وقـلـبـي لـــو ان الـــود وده يـخـاويـك
ميـر الظلـوع العـوج تكـبـح جمـوحـه