يهزك الشوق وتجيني من اقصاك=وانا ليا اشتقت يرويني مجمك
اشعل شموع الغرام ومد يمناك=وعلي بدع القوافي لايهمك
افهق جديلك ليا غطا محياك= وسولف على عاشقٍ قلبه يضمك
اسامرك واتعجب في مزاياك=واقول ياكبر حظ ابوك وامك
سبحان من كملك بزين واعطاك=في هيبتك خالقك يازين تمك
اهمس دلع جعل كل الخود تفداك=ياللي جمال العذارى تحت كمك
اسمي يازينه ليا جا من شفاياك=ودي ماينطق حروفه غيرفمك
انا تراني ضحيه من ضحياك=لو اني ادري..على بالك واهمك
وقتي ظلام عتيم بدون لقياك=وشوفك شروقٍ يسوق القلب يمك
احبك اموت فيك اعشقك واهواك=حتى لو الوصل سم احب سمك
ولن غبت يازين وسط القلب ذكراك=تجري بدمي مثل حبي بدمك
تبغى الكلام الاكيد انا اتحداك= تشوف قلبٍ مثل قلبي يضمك