[محمد السالم]

أيها الأكارم أعضاء منابع الأدبية وزوارها
مبروك عليكم الشهر الفضيل

............................

رباه ؛ عبدك حنت ظهره مساويّه = من غيل ذنب الهوىَ متروّي وشابع
من شبّته ؛ يزرع السيّة ؛ على السيّة = لين انتحىَ ؛ في مسارب عقده الرابع
يتبع هوىَ النفس لين أحفت خطاويّه = و(إ) جناح ذلّه هوا به دركه السابع
هجير ذنبه يزاور به ؛ من الفيّة = وبركان خوفه ورى ؛ كينونته نابع
متمرجحٍ بين ؛ غابيّه ؛ وباديّه = هذا يجرّه ولاخر يلوي الضابع
في نظرته تبدو اللوحة رماديّه = لا لون فيها ولا تدريج متّابع
تنم عن رسمتين شبه عفويّه = عصفور خايف ؛ ونسر مخلبه جابع
رباه ؛ عفوك على ما كان من نيّة = عبدك بطبعه جهولْ ؛ وعفوك الطابع
رباه ؛ وشحيلته لا جات عصريّة = النود تذري ؛ وعبدك فاللحد قابع