. يـا عـيــــــد . . لاتلومني ياعيد لو ضاق صدري لاتلوم قلب اللي مفارق دياره . لاتلومني ان كان مليت صبري ولاتلوم صبري كان مل انتظاره . وإن شفت دمع العين عالخد يجري لاتمسحه خله يزيد انهماره . قلبي ترى يلهب على نار جمري يمكن دموعي تَطْفِي جمره وناره . العيد فرحة ، بسمة شفاه أدري وما للحزن والضيق ذكر بنهاره . أدري نهاره يجمع الناس بدري وتعيش من بعد الممات الزيارة . هذا يسولف وهذا يلعب ويجري وهذا يسلم .. في سلامه حرارة . بالمختصر عيد الفرح يوم حصري يوم الفرح يوم السعد و البشارة . قسوة قلوب الناس في العيد جبري غابت .. وكن الضيم عاش إحتضاره . والحقد فارق يومنا قبل فجري وشفت الحسد يرحل وينفض غباره . تطْهَرْ قلوبٍ رجسها كان يسري ولانت قلوبٍ قاسية كالحجاره . ياعيد أعذرني ليا جاك عذري لا شفت دمع العين هل بغزاره . سلّمت دمع العين مفتاح صبري متغرّبٍ بالعيد حنّ لدياره . يا عيد أدري تفرح الخلق أدري وأنا الوحيد اللي بكى في نهاره . . شعر عنـــــــاد . . .