سلام يا نهاض على راية المجد=لعلى مقام بالوقار مهيوبي
يا ابن الكرام كبار الاذكار لاعد=تاريخ احداث الدهر والخطوبي
هل السامة العليا هل الحل والعقد=اللي لهم سلم المروة دروبي
ما هوب واجد لاتعليت مسند=وساع النهايا للنحايا قطوبي
ابوك من يغني الفقارين ويمد= جزل العطا غيث اللهيف الطلوبي
دمث الجناب القاصده غض وان ضد=للمعتدي فض غليط غضوبي
حر من العليا حراويه وابعد=من صيد صياد الزهيد الهروبي
وبلعون يا ترثة لجاويد لك جد=هذاك ستر مخضبات الكعوبي
هذاك من صيته على اليوم للحد=بأقصى الشمال وشرق غرب وجنوبي
عيسى الى وصل الحكا كلمة الجد=حامي الصخيف ام الحوار الحدوبي
حامي عقاب الحاينه حامي الحرد=حامي الورى يوم الخفيف مغلوبي
يوم المثولث واشهب الملح يركد=وينقاد من بطن الوطى له لهوبي
عج سحابة مكدم اللون مسود=نو سنا برقة سرى له شبوبي
الى اعتلى قبا من الخيل مقود=شيخ يعرضها الخطر والعطوبي
تلحق وحبل عنانها يركب الخد=ربدا سناد للشكايم جذوبي
عاداتها تحدا على الموت وترد= الى خفت الحلبة خفاف القلوبي
واما انت ياشيال حمل الملهد=يا ذا الحبيب اللي نباك محبوبي
ياحاكمي بالأمس واليوم والغد= ويوم العضيلة يا مفرج كروبي
ياشيخ ما جيتك على شان مقصد=دنيا ولالي في طرفكم انبوبي
تسعة عشر عام وانا عنك منلد=وقلبي لطاريكم زهوف طروبي
وانتم لنا خل قديم على ود=ونعيم عضو من عضاك محسوبي
وحبي لكم ما فيه لوم ولا نقد=انتم هلي عزي وعنزة شعوبي
وانتم هل الدين القديمين واشهد=ان الوفا حق علينا وجوبي
الطيب دين ما بين الاجواد ويرد= وفا الدين كله كامل ومحسوبي
ولاينكر المعروف رجل ولا جند=الا مقاصيف الرجا والسلوبي
ضعف النفوس الواطيه والمقعد=اللي يعدون الزهايد كسوبي
والا المنافق راعي الكيد والحقد=في الوجه له وجهن ووجهن كذوبي
مثل البهيمة ما تربح ولا تسد=الا ان يغذيها العلف والشروبي
عذراء وتكرم للعشاشيق مرقد=تلعب على الحبلين رقطا لسوبي
سلمان يا ريف المواجيف يا عد=عد جباه من النزول معروبي
ما كل من ودعت الاسرار له سد= وما كل خل في النوايب ينوبي
حنا عيال الي تحت جابر الخد= ربعك ومقدم دولتك في الحروبي
عصامية ما نطلب المد من حد=الا انت يا مقدم رجال العتوبي
والخير الي دايم الدوم يعبد=الله علام الخفا والغيوبي
ياشيخ ما زحنا من الدار بالعمد=ذا شان دورات الزمن النكوبي
الا نهمت الحر والحر ما رد =ذا صنع طراد العزوم التلوبي
وذا صنع راعي قالتن حظها صد=تقاصرت اشياه نوب ونوبي
نوب من الدنيا ونوب من البد=ونوبن بصوبن والروابع بصوبي
يشدي الحيد بيده حامي الكد=من كثر ما شل الحمول مغصوبي
حيد صبور قاسي لحقه البد=واحفاه من سوج المسامة ضروبي
ولو بالخيار وحكم الاقدار باليد=ماكان زار الخير بيت العزوبي
وبيت الثنا والخير والي بهم بد= جمال الحمول معفيين الصعوبي
راحوا من الديرة فراقين وبدد=وتربة منازلهم عفاها الهبوبي
لكنها قسمة وما قسم للعبد=ما عنه لو هو بالحروز محجوبي
واسلم حماك الله يا حامي الحرد=وعساك دومن بالوقار مهيوبي