سـلام يـا وارث مراسيـم وسلـوم=بيت على ساس الثنا صلب وصحيح
بيت الذرى بيت السخا بيت شغمـوم=بيت الجماله في الليالـي الشحاشيـح
بيت مـن السابـق عواديـه داهـوم=زبن المخيف ومبرك الضمر الفيـح
بيت حمى سوره صناديـد وقـروم=من يوم عصر المارتـي والقداديـح
يا شيخ يـا فكـاك عسـر ومبهـوم=عقد الروا لو معجـزات الزحازيـح
من جوبة الظهران عند الضحى اليوم=خذنا على الممشى صحيح وتصريح
جيتك على قطما الجناحيـن زيـزوم=سـرب البعيـد مدنيـات التناتيـح
ترهي على الفايت بنوهات وعـزوم=وتلحق سحاب خف به عاصف الريح
تشدي لفرخ في السما كسـر الحـوم=وانحى على صوت الدعا والتلاويـح
انحت على خط على الراد منضـوم=على الساحة الجردا على رقة السيـح
على سفح واحـات وميـدان تعلـوم=ومدهال سمر مدرعـات مصافيـح
وخلافهـا دنيـت ظافـي وملمـوم=غض التواير دمث الاسيات ومريـح
اسمر حمر يبدي بموجـات وسهـوم=بين الخضار ورونق الزرق والشيح
عليه القرنتي فـوق الآلات مرشـوم=وما داره الحرفـي بسـود المفاتيـح
يوم انتهض زعل من القير مزحـوم=يزنف كما يزنف زعول التماسيـح
احمى وكنه من على القـاع بيقـوم=وقمت اذكر الله من عيون المشافيـح
طاف المدر والخيس وانحاز لحـزوم=ارض الرفاع وزاميات الصحاصيح
دار بها اللافـى عزيـز ومكـروم=يمة قصور فـي النـزاوه لحاليـح
ونصينا الرفيع اللي على القاع مزموم=قصر زهى لون الزهر والمصابيـح
جيناك يا من للرجا قصـد وحلـوم=قلب جرع ضيـم الليالـي قراطيـح
جاني نباك وفرج الصـدر وهمـوم=ليل سرى صوت الرثـا والنواويـح
جابوا نباك اصحاب واجناب من قوم=وطرشان من شتى الشعوب النوازيح
قالوا توفى كعبـة الجـود مرحـوم=مرحوم يا رمز العـلا والمطاميـح
والحر مات وخلف الحـر صـاروم=وذا ماكر عش الحـرار الجواريـح
شقر حفيف طيارها رمـع وهجـوم=شنع الضرايب من حـداد الكواشيـح
قالوا تـول والـي العهـد مرسـوم=حامل اختام الشيخ مهـر وتصحيـح
امر من الحاكـم صريـح ومفهـوم=وصية من والـي الامـر ترشيـح
الا يا عريب البيت يامـن لنـا دوم=نرجيك رجوى المتعبيـن الكواديـح
حق علـي بحكـم مجنـاك ملـزوم=افضي عليك اسرار شكواي وابيـح
مريت يا عيسـى بـلاد لنـا يـوم=يوم البخت عـدل ولا بـه سواميـح
يوم الدهر من صوبها عدل ونجـوم=غدرا سماها واضحـات مضاويـح
كانت كما روض من الوبل ماسـوم=فيـه الخزامـى كاسـى المساطيـح
وكانت وكان مراحها مرح وعمـوم=وسكانهـا سمـح الوجيـه المفاليـح
أهل الصحون اللي بها غصب الكوم=ومجالـس مـا غلقـت بالمفاتـيـح
هم الند يوم الضد له نـد وخصـوم=وهم العد لى قل الثمد والنضاضيـح
نعيميـة لاسلافهـم مجـد ورسـوم=على ماض التاريخ بيض مواضيـح
لأهل الذكا علم حـوى درس دبلـوم=ولأهل الثنا غرق صعيب المشاويـح
ربعك إلى حلت بالاوطـان مقسـوم=لي ثقل المحزم عـروض المشابيـح
يوم الهدايا ضربهـا كـز ولطـوم=هدف السيوف المرهفـات المدابيـح
ويوم العمار بسوقها يطـرح السـوم=ودلالها ينخى هل الـزود ويصيـح
ويوم الصعوب حمولها حذفت كـوم=وعود على الحمله جمـال طحاطيـح
جمال الرجال اللي لهم كار وسلـوم=عض النواجذ في سنع هبـة الريـح
اقوله ومثلـي قالـه البـدو وعمـوم=الحضـر سكـان المـدر والفلاليـح
ولا خير في قول على الحق مزعوم=قولـى وكـاد وبيناتـى مواضيـح