يقولي اسـف ترانـي خدعتـك
البارحه خنتك وانا اليوم باتـوب
ثم قلتله وشهو تـرى ماسمعتـك
سامع ولاكن يمكن يكون ملعـوب
تلعثم وثـم قـال ادري وجعتـك
حبي ترى ماغيرك اليوم محبوب
غيرك خدعني في غرامه وبعتك
انا ترى مثلك من الغدر منكـوب
ثم قلتلـه يازيـن والله نزعتـك
من الخفوق وحبك اليوم مسحوب
صنعتني فالحـب والا صنعتـك
ثلج الغرام بجمرة الغدر بيـذوب
هي غلطتي فالحب وشلون طعتك
دخلتني فالحب من اوسـع دروب
ياكيف طاوعتك ورى مامنعتـك
ماحدن بجابرني ولانيب مغصوب
ادري مصيبـه ليتنـي مانفعتـك
يمكن قدر من قبل لاعرفك مكتوب
مع السلامه واعتبـر ماسمعتـك
وباعتبر حبك مع الوقت ملعـوب