"انتمائي للوطن ما هو حدود"
*
الوطن معناه يكبر بالوجود
ويستمد البوح باحساسٍ نِدي
له حروفي والمعاني والورود
والمشاعر كنها طفل يْعِدي
كل يوم وحبه بقلبي يزود
من نهاياتي لساعة مولدي
انتمائي للوطن ما هو حدود
ولاقصيد ولا بساطٍ أحمدي
انتمائي يحتوي صدق العهود
لانتهى بي كل معنى يبتدي
حبنا للدارمن عصرالجدود
(وِرث من جدي وابعطيه وْلدي)
ما يزعزع حبنا هرج الحقود
ومن يخون الدار لا بد يغدي
الوطن شامخ رغم كيد الحسود
بحكمة اللي رد كيد المعتدي
الوطن يفداه ضباط وجنود
وكلنا من دون أرضه نفتدي
الحميا ما تبي قلبٍ شرود
والمواقف ما تبي شخصٍ ردي
للوطن نهج ومضامين وقيود
وكل مسلم فوق أرضه يسعدي
وبالتسامح والمبادي والصمود
كل غادي للشريعه يهتدي
دارنا أرض الرساله بالوجود
ما وطاها أي فاسق عربدي
دارعز.ودار خير.ودارجود
في غلاها نقرب اكثر ونغدي
والسفيه اللي جزاها بالجحود
ليل يجتاحه ظلامٍ سرمدي
ومن نواها بالخديعه ما يعود
يكشفه رب العباد ويقتدي
دارنا من دونها نسل الفهود
المليك اللي بنظراته مدي
كم مسح دمعة يتيمٍ بالخدود
وفي يمينه مدة الكف بْردي
ربنا يحفظ لنا آل السعود
وصيتهم بالعزمن فوق الجدي
عذراً لغيابي أيها الرائعون
وكل عام وأنتم بخير
ينابيع السبيعي