السلام عليكم ورحمة الله وبركاته
مصافحه أولى لي في هذا الصرح الشامخ
على أمل ان ترتقي الى مقام ذوائقكم السامي
ماباقي الا منك ياطول صبري=راس الهرم .. ولا ليا آخرك ذايب
ياصعب بين الناس كسري وجبري=جروح ماتنشاف .. فيني عطايب
الجرح بعض احيان بالجرح يبري=جرحي بليا جرح ماهوب طايب
جرح ماهو قديم .. فيه أمس خبري=ينسي ألم جرح عرفتوه شايب
كم واحد لاحلامه يمر عبري=وانا عن الاحلام عامين غايب
اسهر ويكتب لي من الياس حبري= ( مذنب ولاني عن خطاياي تايب )
الي يبي يقهر شموخي وكبري=في ظلي وظله .. قضى عمر .. هايب
وانا بدربي .. ماقصر يوم شبري=الا على بيبان كل الحبايب
مالي أمر على أي إنسان جبري=نعيش انا وياه عيشة غرايب
حلفت تكتب يامن تحفر قبري=مجهول عاش . ومات .. فوق النصايب