[قديم الشوق]

المشاركة الأصلية كتبت بواسطة العليا

كلي عذر للغياب
وحضور متواضع أتمنى أن يرتقي لذائقتكم الراقيه ..

البارحـــه همي طوى خافقي طي=وأوقد سعير الحزن جمر وشظايا
تكفى ياليلي خفف جروحك شوي=تعبت أشوف عيون صبري عرايا
كريـــــم ياجرحي مثل حاتم الطي =لا والله إلا زود وأكثرعطــــــــايا
تسهر معي إلين مايبلج الضــــــي =وتواصل السهره إلى أخر مدايـــا
وإلى غفيت شوي تجمرني بكـــي =هم (ن) يفتت مهجتي من عنايـــا
أجمع جروحي واتذرا أبي فـــــي =والقى هجير الحزن يركض ورايا
واطيح باحضان الألم آآآه وش بي=ماعدت اميز صاحبي من أعدايــا
أصبر وأداري شي وبخاطري شي =وياكثر أشيائي وقـل أصـدقـــــــايا
أيــــــوه ياقلبي وش اللي جرى لي =وشلون ذاك القلب يجهل خفـــــايا
ألما كثـــير وياكثر حولي المــــــي =ولا قدرت اشرب ولا أروي ضمايا
ماكل حي إن غــــــــاب ينبدل بحي= بعض البشر غايب وهو بالحنـــايا
ياعين ابوي أرجوك لا تنشغل في=أطلق حجاجك وأبتسم للمــــــرايا
الحزن من قبل أعرفك ساكن (ن) بي=ومتكحل بالعين دون الصبـــايـا
هويتي دمعه وجمـــــره بها غي=وميلادي الحرمـــان يمشي معايا
وش الجديد إن إنكسر داخلي شي=ووش الجديد إن ضعت بين البرايا
من يومني طفله وانـــا أحترق زي=شمع (ن) يذوب وتحتفل به زوايا
أصغر جروحي قلب لو تلمسه بي =حــــرام لا تحرق يديك الشظــايا
وأكبر طموحي يوم به يشتعل ضي=حلم (ن) حملته واكتمته الخفايــا
والحين لحظـــــه بس بقولك شي=وأبيك تفهمني وتسمع نـــــــدايا
صحيح وقت(ن) بك جمعني ماهو شي =بالنسبه لعرف البشر والحـــكايا
وأدري بأن ايام معرفتك شوي =بعيون من يجهل بياض النوايـا
لكن وعز اللي خلق ميت من حي=إنك مسوي بالحنايا ســـــــوايا
وأنك معمر قصر وبيوت في حي= ومداين ودوله وجيش وســرايا
وحصون ماشيفت ولاله أبد زي=إلا بجوف وعين جت لك سبايا
سبيت لك روحي وكبلت بيدي =شموخ قلب(ن) ماسعى للرزايا
وضعفت لين الضعف ورث لي الكي=وتساقطت أنفاس قلبي معـــايا
وجيتك وانا ارجف والجمر ساكن(ن) بي= والبرد من دونـــــــــك وقربك دفايا
وأزعجتك بشوقي وكثرة أمانــــــيي =وكشفت لـــك أوراق داخل حشــــايا
وروضت لك عقلي وقلبي وقوافيي = وعسفت لك أطهـــــــر شعور الحنايا
وهذا وتوي أعرفك كيـــف لو لي = عشره معك وسنين يااغلى البرايا
وانا الذي ماني مثل هــــذي وذي =ولاني مثل غيــــري عديمة مزايا
ساسي عريب وبنت من ذكرهم حي=يعـــطون مايرجون رد العـــطايا
ماقول ابوي امير لكن ماهو شوي=علمه ينومس بين مدن وقرايـــــا
من يجهلك مايبرر اللي حصل لي =ومن يعرفك يشريك بأغلى الهدايا
وانا عرفتك قلب به طهر به ضي=وجيتك لبيتك ما حسبت الخطايا
وطرقت باب الوصل والقلب بيدي=عصفور بلله الوله من ظمايــــا
وطار الخفوق وجاك باخر نفس بي =ويومه وصل بابك تهاوى معايا
وطاح بيديك وطحت بعده انا زي=طفلا يتيم وشاف بسمة شفايــــا
من كثر ما حبيت قربك ياغالي = ماكنت احسب من يقول الوشايا
ولا كنت اقول يحبني او ماهو لي=أهم شي اني اشوفه معـــــــايـــا
يكفي احبه واشعر بنبضته وهي=ترقص طرب في داخلي من غلايا
والليله اللي جابت مواصلك لي =واروت ظما روحي وضوت سمايا
مدري علام الحزن فيها سرى بي =ومدري وش اللي زاد فيها شقايا
شعورها قاسي ومنها نبت فـــي =علقم ولكن شلتها من وفـــــــــايا
وغمضت عيني وازرق الدمع منشي =يرعد سحابه ويرتوي من عنايا
حسسستني بان الأمل فيك مقفي=واني بروحك مالي أية بقايــــــــا
مدري ومدري آآآآآآه ياليتك شوي =بليله تطل بصدق بين الحنـــــايا
وتشوف بحرا داخلي ساكن(ن) بي = تلاطم امواجه حنين بحشايــــــا
تنسفني امواجه على جالك وبي =يصرخ شعور الصمت بين الشفايا
ياحسرتي من عبرة(ن) تنتحب بي= عجزت أداريها وزادت بــــــــلايا
تحضر معاك الروح وان رحت تمشي = تغيب روحي معك ماهي معايــا
العمر لحظه سيدي ومابها شي =لا جيتني بالشوق تسبق خطـــــايا
أظما على كلمة غلا منك به لي =يحيا شعوري ويتسامى غــــــــلايا
واجيك وحشود الوله طايره زي=سرب(ن) مهاجر والسماء هي سمايا
والى وصلتك اوقف أتأمل شوي= واشوف حزنك واتراجع ورايــــــــا
ماهو لأني خايـــــــفه أحمله في=وانا الذي قد قلت جرحك دوايـــــــــا
لكن أخاف يكون همك من يدي =واكون كحلتك بمكحل عمـــــــــايا
لاصرت رايق شمس الايام لي في=ولا ضاق جوك تحترق بي سمايــا
لايضيق صدرك مني بيوم او لي =مابي احس اني وهبتك شقــــــــــايا
علياك كان الوصل يشقيك له عي=وانا أبسحب خطوتي من رضــــــايا
مانت برخيص بخافقي يابعد حي= ولا أقوى العزاء لو قلت عادي عزايا
وعلياك لو بيده لك العمر تعطي=ويصير لك عمرين دون الرعــــــايا
ولو السعاده يااقرب الناس بيدي= ماابخل بها لو كنت ماانت بمعايـــــــا
وان كان شعري ضايقك اهجره زي= ناس(ن) تمر ولا تشوف الخفايا
والحين غمض عينك وأقترب لي= ودي أقبلــها ولا ابغى هـــــدايا
والعذر منك كان قصرت في شي=سامح قصوري واعتذر عن خطايا

العليا

ياهلا وياغلا

ومن طول الغيبات جاب القصايد

شاعرة مبدعة

وقلم أنيق

ومشاعر متدفقة

وإحساس مرهف

ونفس شاعري طويل

صح لسانك وانا اخوك

على هذه القصيدة الأكثر من رائعة

ولا تطولين علينا مرة ثانية

وتقبلي فائق احترامي

أخوك / قديم الشوق