[شامخ الرشيدي]

السلام عليكم ورحمة الله وبركاته

آمل ان ترتقي هذه القصيدة لـِ ذائقتكم .. وتجد لها قبولا ً في نفوسكم ..


:
:

ذبل رمش العيون من السهر .. واتلمّس المرقاد = رمى ثقله على صدر الصباح .. و عانق انعاسه
غفت عينه مثل عين السجين اليا ارهقه جلاد = تحت خده .. بقايا للأمل .. والصبر .. واحساسه
غفت عينه .. ولكن كانت الصحوة له بمرصاد = همس بأذنه .. بقايا حلمه .. اللي يلفظ انفاسه
دفع نفسه مثل طير ٍ .. تخيله بندق الصياد = ترك عشه على غصن الشجر .. يوم الخطر داسه
وثب .. واطلق كيانه للرياح .. وحزنه المعتاد = عليه من الهلع .. سود السحاب .. وخوفه الباسه
عليه من الزمن .. ( بصمة حزين ) .. وعين للحساد = عليه من الليالي .. غربته .. بين اهله وناسه!
وقف بين الأمل والياس .. والجثمان والميلاد = يصبّر حلمه اللي يحتضر .. ويشد له باسه
غريب .. ويمتطي صهوة ظروفة .. والحزن ميعاد = غريب وغربته .. غربة حياة .. ونفس .. وادراسه
غريب ولا صديق ٍ يعتبر عند اللزوم .. اسناد = غريب! الا وحيد .. وتطرق الايام في راسه!
ملامح شوفته .. لوحة رسمها .. كهل من بغداد = ملامح تحكي .. الحزن الأكيد .. وتقرع اجراسه
تجاوب نظرة اعيانه .. سؤال الجاهل النشاد = وتعكس واقع ايامه .. وتشرح قصة إفلاسه
تقول انه سجين .. وذكرياته في يديه اصفاد = تقول انه مع الغربة .. شرح حرمانه وياسه
من اخيوط الصباح .. يبروز الغربة .. وطن وامجاد = ومع جنح الظلام .. يغادر البرواز .. كراسه
حياته فوضويه .. وانحدار ومنحنى وابعاد = ولكنّه هرم .. يثبت على صحراء الألم .. ساسه
نزف قلبه دماه .. ولا بكت عينه فراق ابلاد = سكب دمه على بحر القصيد .. وفاض هوجاسه
هواجيسه .. على شط الحقيقة .. سفنها .. ورّاد = ومن عمق الحقيقة .. يسكب اصدق حرف في كاسه
حروفه لو تبخر .. ما احملتها السحب لأرض اعباد = ولو تبقى على البحر .. اعتذر .. لولوّه وماسه
لكم شكره وعرفانه .. ونبرة حزنة المعتاد = ومعزوفة عناقيد الأمل .. والصبر .. واحساسه!!

:
:
:


وسلامتكم ..
اخوكم .. ابو نايف