السموحه منك يالقلب الكبير=ماحصل مني غصب ماهو بيدي
انت تعرف غيرتي لما اغير=يظلم بوجهي ظلامٍ سرمدي
يشتعل في داخلي نار وهجير=من لهبها ماتهنا بمرقدي
مااحس الا وانا سيف النصير=اولى طعناته في قلبك تبتدي
واللي يذبحني سكوتك يالصغير=دوم صابر وانا اطعن واعتدي
ماتكلم لاجل في حبي اسير=غايتك ارضى وتسعى لاسعدي
ويل قلبي من الم جرحه شطير =جيت يمك اسبق الخطوه عدي
ماقصدت اجرحك يالوجه المنير=ولاقصدت ازعلك لحظه يابعدي
التمس عذرك وانا حالي خطير=وماحصل مني غصب ماهو بيدي
قصيدة لشاعر المنابع الأدبية
عبدالله الرقاص