[فايز آل بذال]

السلام عليكم

مساء الورد :)

أكبر قهر لاصرت تعشقلك انسان=واللي تحبه ساهي ٍ ما درى بك
وأكبر قهر تحلم وتحلم لك ازمان=ويطيح حلمك ميت ٍ عند بابك
وأكبر قهر تبني من سنين بنيان=وتشوف بنٌيك ما تعدى ترابك
وأكبر قهر تسقي من الورد بستان=وتموت بين يديك زهرة شبابك
وأكبر قهر تارد على البير ضميان=وتشوف بعض الطين حايس شرابك
وأكبر قهر لاحطوا الناس نيشان=كل ٍ يزٌهب وانت ضايع زهابك
وأكبر قهر ترهي على حصان خسران=يوم السبق لا طحت كل ٍ حكى بك
وأكبر قهر لاصرت ضايع وعطشان=ونفس الطريق اللي يوديك جابك
وأكبر قهر صاحبك لا جاك خوٌان=لابحت له بالسر راح ووشى بك
وأكبر قهر تعطي وتعطي علشان=تاخذ عقب كل العطايا حسابك
كل ما ذكرته لك على الشوف ما كان=حفنة حروف ٍ مع بعضها تشابك
ماهوب هرج ٍ يِعجَنْ بفم وللسان=ولاهوب عود ٍ يكسره حد نابك
إن كنت فيما قلت تحتاج برهان=ناظر وتلقى في عيوني جوابك
وإن كنت فيما قلت مخطي وغلطان=أترك خطانا وأنت عطنا صوابك

وسلامتكم