وشهو عقبه اعتذارك روح ما بي لك عذر=قل نبض القلب عقبك وكم تسلابي العويل
لأني هنت النفس عندك وأءتمنتك من غدر=وش بلاك تحز فيني وتطعن بليا دليل
هي سنه مسمعت صوتك ما هو بأيام أو شهر=زادت أوهامي ودمعي لا وقف عود يسيل
ما تذكرت الشفايف و ريحة أنفاس العطر=ما تذكرت الموادع وغنيتك وقت الرحيل
أمس لامن غبت أهوجس وأتحرى وأنتظر=بس بعد العام قل لي للهوى وشهو البديل
الجحيم اللي عرفته من أساميه الصبر=شف تخيل كم مسمى يا أناني يا بخيل
كم قصيده لك كتبت وكلها حزن وقهر=خفت حتى الموت بعدك خفت منك مستحيل
لا تسلني عن دموعي وش بلا عيوني تدر=ما لك الحق بسؤالك لا تسل لأنك دخيل
كاس حبك لي مليته طاح مني وانتثر=من كثر ما أشتقت دمعي سال وسط الكاس سيل
وأختلط حابل ونابل واللي أخفيته ظهر=وعلموني إنك أقسى وقالوا عن طبعك ثقيل
بس أنا سكرت قلبي حظ قلبي له صدر=احترفت الحزن لكن حزني الحزن الطويل
كان يا ما كان أحبك مبتدأ ما له خبر=كنت أنا تابعك لكن من تبع قلبه ذليل