العمر فرصه والحياه ايام والدنيا ظروف =والمشتبه فالامر ما بين الحرام من الحلال
والشعر ديوان العرب وانا بشعري فيلسوف= أترك أدقاق الشعر وأنقى من معانيه الجزال
والبارحه صدرالجنوب يضيق وتسوق الحسوف =وين أنت يا صدرالشمال أحتجت للفزعه تعال
وردت مجاهيم الليال أحيام ورياحي شعوف = من يوم وقفني بدرب العشق يسألني سؤال
وأقوله بيني وبينه يا عسا الحب مخلوف = ان مارجع ربحه علي الله يرده راس مال
كم لي وأنا تكويني الدنيا على روس الكتوف = وأشيل ما لا أطيق من شانك وأحمله الجبال
ومديت لك ريحانة الاشواق في بيض الكفوف = قبل يجف العطر والاوراق تدفنها الرمال
وقفتني بالشارع الضيّق وممنوع الوقوف = مسار واحد والمصيبه لا يمين ولا شمال
تقول طوّفها معي واقول عيت لا تطوف = اجيبها منا تجي منا و لا فيها مجـــــال
الحب ما ينفع معه فزعه ولا واو معطوف = الحب لو زالت جبال الارض ذكره لا يزال
يرقا على رجم الغرام ويخدمه نبض الحروف= اشوي من نسج الغلا واشوي من نسج الخيال
وش عاد لو غنيت طاروقك وصفيت الصفوف = صفٍ يبا ياقف معي وصفٍ اليا من رحت شال
والله لتبطي ما وصلت ادنى مواصيل الهنوف = الجادل اللي دمعها لارحت والا جيت سال
الجادل اللي طيفها عندي ولا كل الطيوف = ام الحلا / ام الغلا/ ام الدلع / ام الـــدلال
اللي هداياها ملت كل الزوايا والرفوف = يطلع ابطلتها بدر ويغيب لا غابت هلال
وانا اقدرها مثل تقدير حاتم للضيوف = وأطرب على فيّة غلاها كل ما مال الظلال
واعيشها عيشة عمر مابين أمن وبين خوف = وازرع لها شعري وهي تسقيه من غيث الوصال
حتى خذتني عشق وانا خذتها رغم الانوف = واسكنتها روحٍ عن أهروج البشر منفى اعتقال
والا أنت قربك ما يشجعني وفرقاك امعروف = أقلط على نزف الشعر والفال يقفاه العقال
حتى لو أنت ألذ من تمر المدينه والهفوف = أرحل ترى أيامك خضر لكن ترى أسنينك اهزال
وفر أدموعك دام دمعك مر والدرب امحفوف= جعلك فدا من هلت ادموعه علشان ابتهال