بعض الطواري تجي وتروح ماهمّت=لحظات تطري وباقي الوقت ما أطريها
وبعض الطواري تتل القلب ماسمّت=تقلب حياتي من أولها لتاليها
تكشف جروحٍ لها عامين ما التمّت=في داخل الصدر كاتمها ومخفيها
والجادل اللي من ورود العمر لمّت=أجمل سنينٍ معاها كنت أقضّيها
تمكّنت في ضميرٍ حي ثم نمّت=محبةٍ من صميم القلب بانيها
ريحانةٍ توّها في عمرها زمّت=بستانها القلب وعروقي تغذيها
واحالي اللي براها الحب وانسمّت=وأهل الهوى طاري الفرقا يعنّيها
يافرحةٍ في زمان الحب ماتمّت=كنت أبني أحلام عمري في حراويها
لو إنها بالفراق الصعب ماهمّت=ما أهم بفراقها لين إني أرضيها
لكنها أختارت الفرقا ولا اهتمّت=وجازيتها من جزا ماسوّت يديها
مسحتها من سجل القلب وانضمّت=للعالم اللي تغيّر في مباديها
عمت على روحها يوم إنها عمّت=على غلاها وذكراها وطاريها
والله ماني بـ هاك الزول متشمّت=لكنها غلطةٍ مانيب ناسيها