قالوا تحب وقلت بالحيل حبيت=والحب سنة من قديم الزماني
واعلنت حبي للملا ما تخفيت=ويشهد بحبي ربي اللي براني
حب ملازمني اليا اصبحت وامسيت=متمكن بالجوف بين المحاني
حب فرق عن حب بعض السرابيت=اللي يبين وينتهي في ثواني
قالوا جميلة ؟قلت !لوقلت ما اوفيت=عن وصفها ياناس يعجز لساني
مزيونة وان جيتها داخل البيت=نسيت كل الناس قاصي وداني
لامن دعتني قلت حاضر ولبيت=لبيه لبى صوتها اللي دعاني
وان كنت نايم واسمع الصوت فزيت=فزت محب مارضى بالتواني
ياعاذلي ياعنك في حقي اخطيت=ياكيف اطيعك عقب ربي هداني
هذي صلاتي خصها الله بتوقيت=هي مقصدي والصوت صوت الأذاني
يا الادمي وان كان لك قلب واوحيت=احرص عليها لايكون تعصاني
ان قام حظك طعت ربك وصليت=وابشر تخلد في نعيم الجناني
وان كنت معرض لاذن الفرض قفيت=فا بشر تخلد في حميم وآني