شيخٍ حكم ياناس بالظلم واجحـاف=ياكـل حـرام ولا يسـده معاشـا
هاذي معاني بين وقفه ومحـراف=من شاعرٍ بالجزل يعطيـك كاشـا
صعبٍ تحللها ولو كنـت صيـاف=حتى لو انك كنـت ناقـد وباشـا
نايف ترا عند العرب صار نيـاف=قاحص عقب موته توفى رشاشـا
عمرك سمعت بتاجرٍ بس خـواف=خلا القيادي عنه واخذ الخشاشـا
او ددسنٍ فالخط تسبق لهـا هـاف=فوقه شجاع افـذل مايـوم عاشـا
النيل في مصر العروبه والاريـاف=وشلون اهلها بس 00ماتوا عطاشا
هاذي ثماثيلٍ على راس مشـراف=دبلجتها من شان طـاشٍ وطاشـا
ماهي طلاسم سحر كاهن وعـراف=هاذي حقيقه جتـك منـي بلاشـا
بعض البشر ودك على طول ينشاف=والبعض الاخـر ودك انـه تلاشـا
ماكل شاعر لاكتب يتقـن القـاف=الفرق واضح بين جزل وهشاشـا
ولا فيه رجلٍ قرمٍ حلحيـل عـراف=فالمخطيه مع خبـل يقبـل نقاشـا
ترا الرجال اشكال والوان واصناف=الثلث طيـب بـس ثلثيـن لاشـا
لا لا يغرك زين ملبوس واوصـاف=ولا كـلامٍ حلـو فيـه انتعـاشـا
تر اكثر الاصحاب يافـلان تنعـاف=في حاجتك لا احتجت عنٌك تحاشـا
عليك باللي يحتمـي كـل ميقـاف=وان عودت للهوش تلقـاه شاشـا
واحد ولكنُـه يسـاوي لـه الالاف=ماصاحبك من شان يلقى اعراشـا
اليا نصيته ضيف عينه لك لحـاف=والعين الاخرى حطها لك افراشـا
الشطر الاول فالقصيـده علـى اف=والعجز فيها مايجـي غيـر اشـا
صرفتها من مركزٍ فيـه صـراف=ان ما اخلفتك اليوم جاءك ارتباشا