ابدأ بذكر الله عويني على الدوم = الواحد اللّي كلّ خلقه يجوله
في مبتدى قاف(ن) مسخرّ ومنظوم = مثل المطر رقراق ساعة هطوله
يسقي خيال(ن) به خزامى ويشموم = ويحيي عروق(ن) يابسات(ن) ذبوله
لزوم ياحرفي وانا فيك ملزوم = ترقى على متن الخيال وجدوله
ان كان ماتاقف معي اليوم وتقوم = وش فايدة حرفي ورزّت حجوله
لازمك حان وكلّ لازم له قروم = في حضرة الشيخان واهل الزحوله
سلّم على راع الوفاء لازم لزوم = فزّاع سيد الشعر شيخ الحموله
شيخ(ن) ولد شيخ(ن) وفارس وزيزوم = شاعر ولد شاعر ورمز البطوله
هذاك شيخ محمد وفارس القوم = هذاك ابن راشد ولاحدن يطوله
عون المغيث وكلّ ضامي ومكلوم = ريف(ن) على شعبه ومرخي سدوله
لاجاه واحد من حدا الشعب مضيوم = ازاح عنه الضيم واسترّ زوله
صارت دبيّ(ن) تحت ظلّه في تنعوم = تعيش بامن وخير في وسط دوله
ثلاث لامن جات في رجل لو يوم = ملك زمام الكون عرضه وطوله
حمدان وبن محمد وآل مكتوم = ماظنّ بعده فخر نقدر نقوله
في حضرته عذر القمر كان معزوم = عنده وشاف الطيب درّه ولوله
منزّه(ن) عن كلّ ناقص ومذموم = وله مع الابطال صوله وجوله
بسوق المراجل عشت وتبيع وتسوم = على الوفاء منشاك ماهيب سوله
ياشيخ وحروفي وفت مابها زوم = واسمك كبير(ن) والقصيده خجوله
كلمة وفاء ماهي سواليف وعلوم = اقوال حقّ(ن) والمواقف صموله
الشعر الآخر كوم وفــ / حضرتك كوم = قبلك احسّ الفكر ماشبع فضوله
لاصرت ماكتب لاجل فزّاع واقوم = وش فايدة عمري وحرفه وقوله