بسم الله ابدى في قصيدي وبديه=وعلى النبي المبعوث خير الصلاتي
ابدى بذكر الله وذكر النبي فيه=من بعدها ابدى بقصيدي والآتي
الموت حق وكل مخلوق يلفيه=سنه من الخلاّق رب المماتي
مايعرف المسكين ما يعرف البيه=مايعرف الشبان حتى البناتي
ملك يجي مرسول إبأمر باريه=يقبض على روحً لفتها المناتي
وانا فقدت ((ابوي)) والعين تبكيه=واصبحت ميت بس عايش حياتي
ولوّي حزين الدمع بالعين أبخفيه=رجال بصبر والصبر من صفاتي
لكن مصيبه من فقد(( أم)) ياهيه=توْها بنيه كل ليله تحاتي
تبكي تصيح وتطلب الله تدعيه=وتقول ياربي تعجل وفاتي
من لامها بالحزن الله يكافيه=ويجيه ما جاها بلحظة سكاتي
بنتً حرمها الله ما كان تبغيه=صدرً حنون يضمها يا شقاتي
وانا علي الله أبدعي وناجيه=وارفع كفوفي للسماء في صلاتي
لامن ركعت وفي سجودي اناديه=يتقبل الله رحمته بالمماتي
واخر قصيدي بسم ربي ابنهيه=وعلى النبي المبعوث خير الصلاتي