اعلن الربان فالرحله خطر = والخطر وارد على كل احتمال
نزل الركاب يامرهم امر = وانزلوا ركابها والحال حــال
جاهم الاعلان من ضابط خفر = قلت اقضي الوقت قبل الارتحال
ديرة المحبوب بجوار البحر = فدوه لعيونه نويت الارتجال
والقدم سارت يمشيها القدر = والثواني تنتظر وقت الوصال
صدفةٍ مرت وما زالت تمر = والفكر حاير بوصله والفصال
بين تصديقٍ وتكذيب الخبر = حالتي حاله وطال الليل طال
شفت من لاشافته عيني تسر= عيني بعينه وبعدنا المحال
ما عرفني لكن اطباع البشر = والقلوب الصادقه فيها اتصال
يا ثوان العمر ما فيها مفر = اصبري لو ضاع تفكيري وجال
عشت وقتي له وغرقني مطر =واندهش مثلي ونظراته جدال
كانت ايده ماسكه غرشة عطر = طاحت وصارت مثل حب الرمال
عطرها فاح وحوالينا انتشر = وانعقد مني لساني واستمال
مدري ان كانه عرفني وانبهر= اعتقد قلبه دليله عنه قال
المهم انا اشتبكنا بالنظر = وما صحيت الا على صوت ارتحال
واعلنوا الرحله وبالخاطر كسر = وصمتنا مازال كنا في ظلال
ليت ما كنا ولا كان السفر = وليتني ما اعطيت للفكر المجال
ما بغيت ارحل ودمعي ينهمر = طار عقلي او حصل فيه اختلال
ذا جنون الحب لكن من غفر = من يقول الحب ينعت بالخبال
كيف اودع من وقف معه العمر = كيف ابا اشرح قصتي واضرب مثال
الدقايق تزدحم خمس او عشر = وافترقنا ما بقى غير السؤال
وانقطع مني وساءلت الفكر = هو صحيح اللي حصل والا خيال