ما يموت الشـوق .. يا بنت الحـلال !=ولا يهمّـك .. لـو تعاندنـا الظروف
إن غَـدا شوفـك .. عن عيوني مُحال=والله إن القلـب في جوفـي يشوف
.=.
له عيونٍ .. ما عطـت غيرك مَجـال=وغير وصفك .. ما ملا عينه وصوف
لك وصوف اللي على عرش الجمال=مستريحـه .. والملا حولك وقوف
ولك على بالـي إذا شَـحّ الوصال=صورةٍ تَحيـا .. أناجيهـا طيوف
صورتك لا جات .. أغرّقهـا دَلال=إيه أدلّعهـا .. وداريهـا .. وروف
صورتك عندي .. على رَفّ الخيال=وغيرها .. مَرمي .. على ذيك الرّفوف
رافـعٍ بروازهــا لأبعـد مَنـال=وغير كفّـي .. ما تلامسهـا كفوف
لا ضميت .. أشرب ليالينـا زلال=والوَلـه .. دايم على ذِكـرك شغوف
.=.
جيت أوضحلك مَعي أبسط مثـال=وما خَفـا .. ياليييت تكفيه الحروف
ذا جواب الشوق .. عن شوق السؤال=احفظيه .. ولا يجي قلبك حسوف
وافهمي .. لو كان لي ظلمك .. عَدال=لـك أكرّرهـا .. ولحّنهـا عزوف
ما يموت الشوووق يا بنت الحـلال=ولا يهّمـك .. لو تحدّتنا الظروف