تطمني محبتك مثل ماهي = لو غبتي عن عيني ليالي مع شهور
حتى ولو عذرك ضعيفٍ وواهي = من قبل لاسمع عذرك آقول معذور
مادامني أعرف شعورك تجاهي = ما اسمع بك العاذل ولا اطيع بك شور
مهما حكولي مايثير اشتباهي = ماهز فيني صورتك هرجة الزور
ياللي بشوفك زال همي وآآهي = الوصل دكتورٍ ولا أي دكتور
لوّي بحر والصبر منبع مياهي = من حر شوقي جفت بحور وبحور
يحق لك يانور عيني بتاهي = ويحق لي في حبك أكون مغرور
مادامني شاعرك لازم أباهي = أعجابك أبدا من مجلة وجمهور
كم بنت غايتها تشد إنتباهي = وأصبح لها عاشق متيّم ومأسور
لو كيفها حطت غلاها بشاهي = وأسقتني منّه لجل أنا آصير مسحور
ماتدري إن الحب آمر وناهي = ينهيني عن غيرك ولك صرت مأمور
ياهي غريبة قصتي معك ياهي = أصدق من الواقع وأغرب من أسطور
لو مثّلت بالسينما والملاهي = أطلق ممثل ما عرف يظبط الدور
من قبل أعرفك كنت ساهي ولاهي = مادار في بالي ولا يمكن يدور
إني أحب ولي عليها نواهي = عيب علي و فوقها إثمٍ وجور
ومن يوم شفتك قلت للقلب كاهي = هذي وبس اللي لها تبني قصور
وقالت بدون أشعر "أحبك" شفاهي = لا وش شفاهي قالها قلب وشعور
ياأم العيون الحور والرمش ساهي = رمشك سهم والقوس عينينك الحور
أنا بحلم ولا بعلم يا إلاهي = أنتي بشر يابنت ولا من الحور
بالمختصر يا موديتنا بدواهي = من شاف زينك غصب يخرج عن الطور