"رحيل عروس"


رحتي وراح الزين والحسن مَعَك
الله على وقت مضى وإحنا جميع
يومك نثرتي رحمتك وسط الملا
يومك رسمتي بردنا جو الربيع
ياللي عيونك نورنا ونجم الفلا
تحرسنا لا قامت خطاوينا تضيع
إن ضاق صدري وأصبح العالم سوا
مفتاح فرحي فرحتك دربي الوسيع
رحتي وريحة وردتك باقي هِنَا
يذكرنا لا صار الذكر عالي رفيع
يصبح ينادي دايمٍ هذا الوفا
يِسمع أصمٍ كلمته ويصمي سميع
مثلك نريده يشتري ثوب الهنا
وإن كان ثوبه مقْصِرِن حنا نبيع
بنتي يطول اليوم وافراحي خلا
يدمي عيوني لاسرى لحظة هجيع
وإن أطلق الصبح الجديد نسمة هوا
مري علينا ريحتك مر سريع
أختي مكانك يفقدك يرثي رثا
أسمع حسيسه لا ارتجى الوحشة شفيع
أدري طويل العمر باخلاقك بنى
بيتن طويلٍ مَشْرَفَه زود النفيع
أدري وربي صحبته تسوى الغلا
وإن شفت باحضانك منَه طفلٍ وديع
أدري ذراعك طاهرٍ يركز ولا
لكن قليبي من بَعَد يبقى طميع
أسْرَي مع الليل السعيد أهلاً هلا
يبكِر صباحك فرحنا ويغدِي وليع