بديت باللي مسببن كل الاسباب = الكاتبن عمري ورزقي ونصيبي
المرسلن غيث المطر تنبت اعشاب = والمودعن قفر الصحاري شعيبي
اللي كسر كسرا وخلاه يرتاب= واللي صدم فرعون يوم الدبيبي
ومن عقب ذكر الله اببدا بالاعراب = واثني على قافن لفابه عريبي
الفن هلا بالذيب والفين ترحاب = ياجعل شمسك يارعد ماتغيبي
دام الامل موجود غاب الاسا غاب = والصبر يجعل من همومك تخيبي
ياخوي انا مثلك ترا القلب منصاب = من هاجسن اودع خفوقي كئيبي
الجرح زاد ولا نفع طب الاعشاب = ياخوي اظنه يارعد مايطيبي
تشكي وانا اشكي من دموعي بالاهداب = شكيت ولا لقيت شخصن يجيبي
مثلك انا جالست ربعي والاقراب = وفي عقر داري اوجس اني غريبي
دنيا العجايب همها اليوم غلاب = لاجيت اعالج مانفعني طبيبي
ولاجيت ابسلا دمعة العين تنساب = كني عليل الروح ولاّ صويبي
عبرتلك من زود همي والاتعاب = وشكيتلك يالشمري ياقريبي
دنيا دنيه طفلها بساعتن شاب = الشيب في عينه وراسه مريبي
كن القصيد من الاسا صاح طلاّب = وفيه القوافي يابعدي تنتخيبي
يوم احتضر شعري ومن فوقه اغراب = يتنا متى مامات قافي بجليبي
وقبل الختام احسب لهرجي لك حساب = واحسب حساب القول وربي حسيبي
ياخوي جنب بالزمن شخص يغتاب = وقدام عينك تحسب انه نجيبي
من مايعرف العيب لابد ينعاب = ولابد مايلقا بيومن يخيبي
وصلاة ربي منزل الحق بكتاب = على رسول الله محمد حبيبي