وش بلى حالك تغيّر ماخبرت انك عنيد=ماخبرت اتصد عني يابعد عمري علامك
غبت يومين ورجعت وصار قلبك من حديد=وش خطاي اللي خطيته يوم تستكثر سلامك
كان همسك لي قصيد وصرت ياروح القصيد=تجرح القلب بنظرك وتكمل الباقي بكلامك
انت ماانت اللي عرفته انت متغير اكيد=لاهواك ولا هنّاك ولا فرحك ولا مقامك
وينها ضحكة عيونك ياعسى عمرك مديد=ما زهالي غير روض ٍ فاح به ورد ابتسامك
في غيابي عنك اسولف للقريب وللبعيد=واسرح بوسط السوالف بين جنتك وحمامك
في غيابي عنك ادور من بريد اليا بريد=عن مكاتيب ٍ توصل لي سوالفك وغرامك
ماهقيت انك نسيت وصار لك حبٍ جديد=كيف اصدق شخص غيري صار هو كل اهتمامك
خابرك صعب المنال وما تطولك أي ايد=خابرك مثل السحاب وكلنا نرجي غمامك
خابرك ظبي ٍ جفول وما تسعك الفين بيد=خابر ٍ لك نظرة ٍ تفرض على الكل احترامك
ماخطر في بالي انك عن مساراتي تحيد=او تبدي شخص غيري في عواطفك وهيامك
وانته اللي كنت اقرب لي ّ من حبل الوريد=وكنت انا اقرب لقلبك من شفاك اليا الثامك
موقفك واضح امامي لاتعيد ولا تزيد=يكفي اللي صار منك ومن خناجرك وسهامك
فالمعاند خذ عنيد وفالشدايد خذ شديد=( مااقبل انصاف الحلول ) ( وموقفي واضح امامك )
ليه تسقيني خصام وخاطري منك قصيد=ليه يسري بي جفاك ومنوة ادروبي غرامك
مثل ما قال المثل ماللحديد إلا الحديد=هذه انهاية كلامي يوم تجرحني بكلامك
كان شوفك يوم عيد وصار بعدك يوم عيد= روح عني يغني الله عن محبتك وسلامك