ياعناد وقِّف وادرك العلم ياعناد=لا لا تلف الهرج وتعيد وتزيد
وش فاد هرجك فالصعيبات وش فاد=ماغير كسرٍ واضحٍ للشواهيد
عان الجمر في بسرة القلب وقّاد=من حرته قد شبّك اوريد بوريد
حط الحطب..والتاليه..حفنة رماد=ثم سفَّها بأيام دنيا التماديد
ماعاد انا بالحظ..للحظ..حصّاد=وماعاد اريد الحظ..وشلون با ريد
مادامه لطير الرخم صار ينقاد=وامسن شياهين الفضا تنحسب صيد
تعاكسن والناس..سرداد..مرداد=تدرك معان الحق..لكن بلا فيد
حاولت ابطوي حالة اليوم تنعاد=حاولت اكايد نكسة الوقت..و تكيد
إن صحت فااااااااهد..جاوب الصوت فهّاد=واكبر قهر..لارِجع الصوت بفهيد!!
كسرك عطيب..ولا أبي لكسرك ضماد=لا بوك لابو من جلبها تضاميد
والدمعه الّي حبسها حرب وجهّاد=احدّها لمحايد الجفن..وتحيد!
كبَّت محاجرها..على انصاص و احاد=وا حيلتي لاطبحن باوسط الميد
ولو ان ضلعي للجليلات نفاد=ما اوحيت لي في غفوة الخلق تنهيد
لكن صدري مكبله ثقل الأصفاد=عن ضيعة العزَّه..ونقد الأجاويد
"ولاّ انت ماجيتك بدور لي ضماد"=لابوك لابو من جلبها تضاميد!"
"وكانك ركبت الراس بالراي ياعناد=بدعي عليك الله واعيد وازيد"