يابنت روحي ماعليكي غبينه=روحي سلامه ودعي كيف مـاكـان
انا حياتي اكبر من المدينه=فيها صراع ومجد وامال واحـزان
فيها شجون وشد فيها سكينه=فيها عجاج وبرق ورعود وامزان
فيها شموخ الذات فيها لعينه=فيها فرح وسرور وانغام والحـان
فيها زهور البر والياسمينه=فيها شروق الشمس صحراء وبستان
باب انفتح من صوبكم قافلينه=ماعاد له داعي ومن دون عنـــوان
اللي مضى بالمرسمه كاتبينه=امسحه وامسح كل غبطات الازمان
مانتي حيات الذات مانتي سفينه=عبارةً راحت كذا دون ربـــــــان
فيها بشر كانوا بهاك السفينه=راحوا ضحايا ضايع فلان وفلان
شئً غريب وشئ مستغربينه=صارت ألم تهرج بها كل الاوطان
ناسً قضمها القرش ناسً دفينه=ظلم عليها البحر مافيه ميـــــدان
ناسً قذفها الموج ناسً حزينه=لليوم باقي غافل الوضع ياانسان
يوم تحب انسان يومً تهينه=يوم تعيش افراح وايام طفشـــان
يومً تدين مال يومً تدينه=عايش معاك العز وتقول حرمان
غير حياتك للحياه المتينه=كافي تقلب مثل شاشات الالوان
فكر بشخصً شايل الدهر عينه=وآخر بعيد العقل والعقل ميزان
فكر بمن فالسجن واللي سجينه=بين الحيا والموت فالقيد منهان
اذكر مريضاً فاقد اللي ثمينه=صحته ماهي كامله بين الابـدان
ولا يتيمً ماتصفق يدينه=قفوا هله مايبصره كود جيـران
هذي حياته بالزوابع سمينه=ثوبه عتيق وحالة الطفل فقـران
واللي بقبره طيب الله جبينه=صلوا عليه العصر ربعه وعربان
لا صاحبً عنده ولا له قرينه=مثله مثل من مات ماغير الاكفـان
يجعل كتابه حامله في يمينه=في جنة الفردوس ماهوب خسران
هذا وغيره طالب الله يعينه=يكون قسمه تالي العمر ربحـــان
هذا الكلام اللي لكم مثبتينه=هذا كلامً صدق مافيه كتمــــــان
مانتي وطن بارواحنا حافظينه=الكل لاجله يقذف العمر كسبان
الله حمانا بالحرم والمدينه=بالليث عبدالله وبالليث سلطان
الروح لاجله والولد مرخصينه=الرابح اللي قدم العمر لاهان
ماني مثال الخلق لاتجهلينه=حالي يعرف الجد فالجد بركان
هيه العمر ماهو لعينك رهينه=ماني حبيس البيت لاجلك بالاركان
تلقين غيري مطلبك تعشقينه=ماحدً ينام الليل يابنت جيعـــــان
حتى الاسد مانام داخل عرينه=يسعى يحصل رزق من غير برهان
كوني لقولي ياغرامي فطينه=وان كان رحتي ياخذ الوضع نسيان

وسلامتكم ..