منتديات منابع الأدبية

يشرفني المشاركة معكم بهذه القصيدة المتواضعة التي ارجو ان ترضي اذواقكم الكريمة

مرت سنين اوقاتنا كلها شوق = من حين نصحى لين آخر ثواني

بس انتبادل نظرة العين بشفوق = والا انتهادى بسمتين واغاني

نسهر نعاند نومنا ليل ونتوق = ضمة يدينا تشرق لصبح ثاني

من صرت انا واياه عاشق ومعشوق = عن كل ذا الدنيا بحبه كفاني

احس به ويحس بي حس مرموق = اقراه من لمحه واشوفه قراني

كلامنا ماهو على الدوم منطوق = احساسنا المرهف رسول المعاني

ثلثين قلبي له من الخوف مطروق = عليه اسمّي كل مالشوق جاني

ان طول النومه اناديه برفوق = وان ماستجاب اجس نبضه باذاني

مالوم نفسي لو بها الدم محروق = كل العتب كله على من سباني

ان رحت ودعني بنظرات من فوق = وان جيت وافاني بحضن وحناني

دايم يلبسني بعد غيبتي طوق = وانا احيطه بالحزام احتواني

طرّز حياتي بامتع الحب والذوق = وانا كتبته عشق داخل كياني

ايام خلق الله لها غروب وشروق = وايامنا من حلوها ماتباني

دنيا رهيبة ماعرفها اي مخلوق = ماذاقها الا واحدٍ في مكاني

الله ماحلى حلمنا ليت مانفوق = ياللأسف فقنا ..وراح ونساني

وسلامتكم

المعذرة حاولت التنسيق ولكن لم اصل الى نتيجة