مع حيرة الفكر والدنيا على فالها = والا الرفيق القصايد يوم ما من رفيق
وآخر قصيدة تجمعّني على آمالها = لا جيت ارتب معانيها يشب الحريق
لكنّ فيض القريحه صاح زلزالها = واستبشر الشاعر اللي بحر شعره عريق
دار النظر في ديار ٍ ما تعنى لها = والنفس رغبة مواصلها لحب ٍ عميق!
في غربي العاصمه يشّر لي ارسالها =للديرة اللي بها زهر الهوى والرحيق
لا وقفت رجلي الثكلى على اطلالها = تستعرض العين جـلّ ايامها والدقيق
ما بين قصة غرام ٍ شدت ارحالها = وما بين قصة غياب ٍ ما عرف له طريق
مكتوب سيف الفراق يمـوّت اوصالها = و تقيـّد الذكريات اقدم شجاع وطليق
آقف وامتـّع عيوني واذكر اقوالها = وتبدو لي اوسع شوارعها بعيني تضيق
وتخنقني العبرة اللي جفني اقفالها = ويستنجد الشوف من عبرة عيوني غريق
و آصد واحضن جروح ٍ ما اقد اشتالها = كنها جبال اجا وسلمى وضبع وطويق
ما ودي آصد لكن حرقة اقبالها = تجبرني اعـوّد ادراجي واحشم الفريق
واكتب على مخرج الديرة ومدخالها = بيتين شعر وحروف اسمي وخبرك عتيق
( سلام ياللي بقالي رقم جوالها = آخر خيوط الأمل بآخر ملاذ وطريق
الموعد .. أولى لقاء الطفله وتمثالها = بين الجواهر .. ثمان احباب والا صديق ) !
ممكن تشوف الحروف وينتعش بالها = و تعـوّد لقلبي اللي ضمّ حبٍ عميق !!