طال الغياب ولوّع القلب فرقاك=واحترت مدري كيف اوصّل سلامي
يازين قلّي وين ودتك دنياك=من غيبتك ماذقت حلو المنامي
انا اشهد انه لاطرالي محياك=يطري علي وجهك وبدر التمامي
يوم اتذكر ذيك الايام وياك=يوم ان قلبك هايمٍ في هيامي
قبل العواذل لاتغير نواياك=يوم انت تغليني وتسمع كلامي
العام انا سيّــدك وآمرك وانهاك=وافرض عليك مع الغرام احترامي
اسمي ليامنك نطقته على شفاك=يصير حتى اسمي من احلى الاسامي
اجوع من سبة محبتك واظماك=واروى على شوفتك لو كنت ظامي
هذي مراسيلك وهذي هداياك=ماعقبها حاجه تثير اهتمامي
والله ياصك وهجرك وجفواك=ماغيرت من عزتي او مقامي