رفرف على روس المنيفات ياطير = وكوسر لحونك بين هذي وذيه
زف البشاير للنفل والنواوير = وعلى الغصون اليانعات العذيه
تباشري ياروضة خريم بالخير= يالفيضه اللي عن سواك محميه
ميلي بحوذانك ليا هفهف عصير = جاك الكريم اللي كفوفه نديه
مثل السحاب اللي قنوفه مزابير = اوله ديمه وآخره عقربيه
لاحن رعاده يفك الازارير = ويصب ماه من الضحى للعشيه
ياحي سجات النفس والتباشير = بين الوجيه المكرمات الرضيه
ماهيب تحسب من حساب المخاسير = لاوالله الا كل نفسٍ غنيه
سلام تسليمة معزه وتقدير = وشيمه وهيبه واحترام وتحيه
لك ياطويل العمر عن كل تقصير = وافي ولا يزهاك غير الوفيه
انت الزعيم مسطر الفعل تسطير = خيرك يعم الشعب روحه وجيه
ياستر غظات البني الغنادير = لاطوحن بالصوت ياهل الحميه
اتورد الظامي على جمة البير = واللي مجنب مايعود الخطيه
تامر يابو متعب وشعبك طوابير = في طاعتك يمشي سريه سريه
حنا جنودك فالمعارك مغاوير= الطيب فينا حي والنار حيه
دون الوطن لك وقفةٍ فعلها غير = إيدٍ قويه والمواقف قويه
كم حاسدٍ خطط يبي لفة السير = وعليه رديت التسامح هديه
عفوك ولطغك زاد في حسرته مير = تسامحك زاد اسود القلب كيه
دربك سنود ودرب غيرك محادير =حكيم في مدة كفوفٍ طريه
امن الفعل لك سطوة كليب والزير = ومن الكرم لك مدةٍ حاتميه
حكيم راي اليافختن الاشاوير = مثل الجدي فاليله الخرمسيه
خذيت من نهج الصحابه تصاوير = تحكم بشرع الله وسنة نبيه
امبادراتك تثلج الصدر وتصير = رمز العرب فالقمه العالميه
لو ان به مثلك على اقل تقدير = شخصين فوق الكوره الدايريه
ان كان شفت العالم يعيش في خير =على السعد طول السنين المديه

عبدالله بن راجس


رائعة بروعة الحرف المنهمر كالمطر


استمتعنا بالجمال


لله درك


دمت بخير