ياصحاري مول جاك القول حذفٍ كالحصاه = من ولد وقدان يوم إن المعاني فتل اديه
عقب ما زارك وشاف بعينه اللي ما اشتهاه = ضاقت انفاسه وغنا قافه الصلد النبيه
بعد ما أستدرج هجوسٍ حامله عشرين آآه = وردتها قافلة فكره على بيض الوجيه
آه يا ورد البيوت و آه يا ظيم العباه = آآه يا فكر الغيور و آآه من عقل السفيه
آآه يا قوم البشوت اللي يردون العصاه = و آآه من قوم السفور اللي بنانا تهد فيه
آآه من سوط السكوت و آه يا قل الدعاه = آآه يا ارباب البيوت و آه من قل الوجيه
آه يا عجز البخوت اللي تناهشها الغلاه = و آه من حمى الظهور بمظهرٍٍٍٍ طبق الشبيه
آآه يا عصر الأصول وآآه من عصر الخطاه = آآه من وقت التحضر و آآه من حضرة بنيه
آآه يا شرالعماله و آآه من همه خباه = آآه من كثر الرذيله وآآه يا قل النزيه
آه واللي يسمع الآهآآآت يسترجع خطاه = قبل لا يخطي خطا من يمشي وحمله عليه
ما يفكر لو نهاية خطوته فيها بلاه = شايل(ن) موته على ظهره وقدامه اخيه
كل راعي لايطبل كل ما شاف الرعاه = طبلت طبل معاها فاتح(ن) بابه وفيه
ينتبه والذيب ما يسطا على من قد رماه = والضباع الوادي اللي به سباعٍ ما تجيه
والمكان اللي يضيع دربنا لا ما نباه = نعنبو من يهتوي ذاك المكان ويهتويه
البلد فيها محل الطيب يا محلا هواه = في خلانا وش لنا بمعشي (.....) ورديه
والله اللي يصلح الأحوال من عالي سماه = خالق الأنفس وعارف سرها واللي تبيه
والختام عداد منبوت الزهر وسط الفلاه = يا صلاة الله على سيد البشر.. صلو عليه

ومن قال سالم

سعد العتيبي

صح لسانك واعتلا شانك

كفو والله

ودمت بهذا الشموخ

تقبل فائق احترامي واعجابي وتقديري