مافادني معها مشاريه وعتاب=راحت وهي متكبره ماتبيني
تصورورا راحت بلاذنب واسباب=ابغى سبب واحد وش العيب فيني
يعني عشان اني بدوي قلبها تاب=من الهوى ماعاد هي تهتويني
ايه بدوي شاعر وللمجد طلاب=وان ماكسبت المدح لاقطع يميني
ماعلموك ان البدو اصل الانساب=ان كان هذا عيب لاتعشقيني
انتي خسرتي حب شاعر وجذاب=لازم يجي لك يوم ثم تفقديني
لوشفتي اللي شفت فعيونها اعجاب=لي ولقصيدي كان ماتتركيني
غيرك كثير اللي تبينا نجي احباب=لو أشر الها باصغر اصبع تجيني
جيتك بحب وشوق ماهو بكذاب=جيتك ويسبقني لشوفك حنيني
جيتك تداوي جرح ينزف ولاطاب=وزدتي جروحي قبل ماتعالجيني
ياكم سهرت الليل واسهرت الاهداب=هذا جزاي اعشقك ثم تجرحيني
بكره اذا صرتي لحالك بلا اصحاب=ويضيق فيك الكون ثم تذكريني
ثم ترجعي واقفل بوجهك الباب=في ذمتي ماعاد تستاهليني