جميع الناس تِدعيلي .. ( شهر ) مَقبول بعْمَالي=تِبَاركلي قدُوم ( العيد ) .. عَساني .. مِن حَيا وعَاده
( رِسَايل ) .. مالها أول .. ولا آخر .. لِجَوّالي=كِثيره .. توصَل ( الوارد ) .. عَجز لا يقبل زيَــاده !
بَعضهم .. يَذكر .. ويَرسل .. رسايلهم عَلى بالـي=وبعضهم .. يتّصل .. يَسأل .. وجَاوبهم على العَـاده
( طَيّب ) .. ( ما عليّ خْلاف ) .. ( أبَشركُمْ عَن أحوالي )=وحَمْد الله .. عَلى كل حَال .. حِنّا تحته عْبـَــاده
كلٍّ ظنّ .. بي ظنه .. سِعيد .. وخَاطري سَالـي=كلٍّ يَحْسب أيامي .. عَلى الأفراح مِعتـَــاده
مَافيهم أحد يَدري .. عن إللي كان يِجرالي=ولا فِيهم أحد مِثلي .. يشيل الهمّ بأعيـــاده
أنا .. ما مَرّني عِيدي ! .. ولا شِفته ! .. ولا جَالي !=ولا حَتى سِمَعت .. إنّه تَأخر يوم مِيعـَاده
غريبه !! .. عَادته يَقلط عَلى مَركاي .. ودلالي ؟=يِسُولف لي عَن أحْواله .. وضَوّي دوم وقـّـاده
غريبه !! .. مَرّ من عندي .. ولا حتّى تعنّالي !!=لا نَاظر .. ولا سَلّم .. وأنا مِذْهِلني عنـَـاده !!
بَس .. لَحظه .. عَرفت ألحين .. ليه ما كان يصفالي=أشوف العِيد مثل الناس .. وأعز الناس في بعَـاده
بِعيده إيييييييه عَن عيني .. وزَاد اليوم غِربالي=يمرّ العِيد .. وعيوني .. عن الغالين .. نشــّــاده
تنشدني .. وش إللي صار ؟ .. وليه المنزل الخالـي ؟=وينه نورها ؟ .. وينه ! .. تقولي : صَاحبي نــَـاده
وأنا .. عاجز أجاوبها .. جاوب دمعي وسالي=على خدّي .. يعَلّمها .. يحاول يوصل مــراده
وأنا في ضِيقة أحْزاني .. أبد .. مَا كان يِطرالـي=تِكَلّمني .. تِعَايدني .. على ( الجوّال ) يا ســـاده
ألو ؟ ( بابا ) .. أنا ( بنتك ) ! .. وهَلّ الدّمع طَوّالـي=بدُون شعور .. وكَلماتي .. تِقل مَاهيب منقـَــاده
( غلا ) بنتي !! هَلا عمري .. ياعِيدي الأول التالي=يا كِل أفرَاح هَالعالم .. بدونك عيد .. وش عـَاده ؟
عَساك بخير .. قوليلي ؟ .. ترا مانيب بلحَالي=مَعي طيفك يِسَلّيني .. خَيالي دوم يِرتـَـــــاده
أنا مِشتاق لعيونك .. وذَاك المبسم الحالي=بَعد مِشتاق لحروفك .. وكِيف مْكَسّره سَـــاده
أنا مِشتاقلك كلّك .. مِتى وصْلك تَهيّالي=بجيك أسَابق الخطوه .. يا كلّ الذوق وأسيـــاده
أشيل الهمّ في صَدري .. ودَمع العين همّالي=عَلى ظَرفي .. عَلى وضعي .. وأشكي ليلي وسَـاده
وأنا رَجواي في ربّي .. الكِريم .. الوَاحد .. العَالـي=يزيح الهمّ عَن صَدرٍ كثير النّوح .. ما فـَـاده
ويحفظلي بَعد ( بنتي ) .. في دِنيا غيرها مَالي=يِعَجّل لي بشوفتها .. ويَجْلى الهمّ وسـْــــواده
أنا حَسبي عَلى ظرفي .. كَانه مَيّل ظلالي=وخَلاّني سِهير الليل .. وكلٍّ مِهتني رقـَـــاده
( يا بنتي ) .. بَس .. قوليله .. منهو خَاطره سَالـي=( بابا ) .. هَذي أيامه .. عَلى الأحزان .. مِعتـَـاده !