طهر كن الثرى لامن مشى يبدي لـه الاعجـاب
طهر كنه مهو مخلوق من تربـه وبلّـة طيـن

عجيب ويربك ابيات القصيـد ويربـك الالبـاب
مثل مايربك الزائر( بعد تفكير) سـور الصيـن !

يقين اني بدونه كنـي الجملـة بـدون اعـراب
حرام اني بدونـه كنـي النقطـه بـلا حرفيـن

احبه مثلمـا حبـه سـواي بنظرتيـن اعجـاب
احبـه مثلمـا حبـه مسـاه وقبّـل الرمشيـن

احبه والغلا ينثر علـى دربـه مزيـج اطيـاب
من الكادي من العنبر من الجوري من النسرين

احبه !! والله ان ودي لو انـي اخلـق الاسبـاب
لجل لافارق عيوني لقاني في عيونه : عين ؟؟؟

كثر ماقلت له (يله) نجي مضرب الـى الاحبـاب
كثر مايضرب اقوالي بعرض الحائـط المسكيـن

جهلت ان الجفا سم ّ ومتاهات : وطريق اتعـاب
وسمعت ان الوصل كذبة وصدّقها نديـم البيـن

وعرفت ان الذي يفرح مدام ان الهـوى غـلاّب
مثل من يغلب اسقامه ويشبع من فلوس الدين !!