رهيبة صورة القمري تشد الفكر للتجوال=ونظرتها تمعّن كأنها نظرات محتارة
براءة في ملامحها براءة عالم الاطفال=دليل الصمت والتركيز مثل الموج وابحاره
شعرها دون تسريحه تمنيت (إ) لها اكون ظلال=واميّز وش تفكر فيه وافتح عالم افكاره
سواعدها النحيفة تسند الفكّين شد احمال=تشاهد قدم عينيها سراب تظنه امطاره
تعانق للشموخ اللي سبق عن سنها بأجيال=غريب المشهد اللي بالنظر ما حدد اطواره
تحكم الصورة الرسام بالتحديـد لـو مـا نـال= معالـم كامـلـة يـرسـم تبـيّـن عالم اســراره
تعرى كتفها ,موضة, وبالمشهد لباس اسمال=من اللون الرمادي له غموض وناي زمّاره
توقف قاف شعري عندها واهتزت الاطلال=على حزن القوافي للمعالم والهدف شاره
بقت في الذاكرة رسمة تعاتب فكري الرحال=تقول استنطق المنظر لريشة رسم واشعاره
على المرفى رسى يخت الهجوس ولا ربط بحبال=ولا همه زبد موج البحر والريح واعصاره
تعمدّت انشغال الفكر يا من بالنظر قتّال=اخذت الدرع من صورة بريئة دونك ستاره