طلت على الدنيا تباها وتختال = في يوم صبحه غير واطلالته غير
اجمل صباح(ن) مر عيني ولا زال = في الذاكرة محفوظ ذكرى خبر خير
طلت مثل بدر(ن) كسى الليل وانهال = على الظلام وحقق الحلم للطير
تحققت بقدومها كل الآمال = وفي وجهها فال السعد والتباشير
تباشروا بقدومها العم والخال = وناس(ن) لهم بالقلب حشمة وتقدير
غنت لها الورقى على كل موال = وتمايل الغصن الخضر بالعصافير
يامرحبا يااغلى من الروح والمال = واغلى من كنوز الذهب والدنانير
يااغلى امنية من عند رب السما العال = اللي بامره دبر الكون تدبير
ياجعل من(سمتش) يضحك لها الفال = والله يحقق ما تمنته ويصير
ويالله عساها تربي عيال واجيال = وتشوفهم في كل محفل طوابير
لولا الامل ماعاش الانسان رحال = ولاسار باقدامه طوال المشاوير
والصبر محمود العواقب ولو طال = ويعيش من قلبه خلي دون تفكير
قلته وانا مالي على القيل والقال = ويارب جنبني هوى نافخ الكير
واحمدك ياربي على كل الاحوال = ويارب سامحني على كل تقصير