أمر القضاء لا حل ما عاد له حل = مكتوب والمكتوب عنه انشدوني
آخر ليال الصوم والعيد ما هل = مات الوفاء والحزن جاله ركوني
اللي كتب ربي على الخاص والكل = ما أحدِ يرد اللي كتب وافهموني
الدمع من عيني كما الغيث لا هل = عيا يكف الدمع تشهد عيوني
والهم في قلبي بنى اليوم منزل = ساسه متين وثابتٍ كالحصوني
مرحوم ياللي غاب ما عاد يقبل = من بعد فرقاكم تزايد طعوني
ابكيك يا محمد بكى الطفل لا اعتل = يبكي ولا يقدر يقول اسعفوني
ابكي وحالي كنها حال منشل = كلٍ تخلى عنه قاصي ودوني
وإلا كما اللي فاقد العقل مختل = يمشي ولا يعرف حياة الغبوني
تعبت من كثر السهر والشقا طل = صوره تمر بخاطري ما تهوني
اليا ذكرته وقف القلب وانهل = انهل دمع العين مثل المزوني
له في حنايا القلب بيتٍ مكمل = ما انساه لو تابس عروق الجفوني
يا عاذلين القلب والجسم منسل = طعم الفراق اصبح مذاقه جنوني
خلوني انعي مهجة القلب وسأل = اسأل ترابٍ ضم ذيك المتوني
أوووواه لو تنفع جلست أتأمل = في صورته في ضحكته والسنوني
أووووواه هذا مرقده كيف يجهل = لا لا تلوموا قلب أمٍ حنوني
لو تنفع الذكرى تذكرت ما كل = وكتبت من دمعي قصايد أحزوني
يا قبر ياللي فيك خلٍ مكبل = تراه ضيفك كيف له تكرموني
يا قبر ما جيتك ولا لي معك حل = نرضى بحكم الله وحسن الظنوني